Со учеството на фестивалот „Мала сезона“ во Софија, Бугарија, на 30 јуни 2025 година, со монодрамата „Кротка“, работена според истоимената новела на Ф. М. Достоевски, во режија на Дејан Ангелов, а во изведба на Стојан Велков-Трн, заврши театарската сезона: септември 2024 г. – јуни 2025 г.
Со претставата „Црна дупка“ од Горан Стефановски, во режија на Љупчо Ѓоргиевски – претстава повеќекратно наградена на минатогодишниот МТФ „Војдан Чернодрински“ – учествувавме на 32. ФКТ „Ристо Шишков“ во Струмица.
Со претставата „Петок 13-ти“ од Жан Пјер Мартинез, во режија на Никола Ристов, во октомври 2024 г., гостувавме на сцената на НУЦК „Ацо Шопов“ од Штип, каде наидовме на одличен прием кај публиката. Истиот месец, на сцената на театарот во Гевгелија, со две изведби на претставата „Царевата нова облека“ од Х. К. Андерсен, во режија на Јасмина Вучкова, ја израдувавме најмладата гевгелиска публика.
На 29 ноември 2024 г. одбележавме јубилеј – 55 години актерска дејност на доајенката на струмичкиот театар Тинка Ристеска. За таа пригода, како благодарност кон нејзиниот голем продонес за струмичкиот театар, ја изведовме претставата „Вујко Вања“ од А. П. Чехов, во режија на Дејан Ангелов; претстава во која нашата Тинка Ристеска ја толкува улогата на Марина.
Во декмври 2024 година се случи премиерата на претставата „Празнина“, работена според истоимениот текст на Алис Бирч, адаптиран од Викторија Рангелова-Петревска и Васил Христов, а во режија на Васил Христов, кој по подолга пауза повторно работеше претстава во струмичкиот театар.
На најмладата струмичка публика ѝ ја подаривме претставата „Пепелашка“, во адаптација и режија на Кољо Черкезов. Премиерната изведба беше во март 2025 година, и продолжи да се игра наредните месеци на репертоарот, со голем интерес од најмладата публика. „Пепелашка“ беше реализирана од сопствени средства, исто како и претставата „Деца на светот“ од Стефан Цанев, во режија на Васил Михиал. Премиерата на оваа претстава беше на 15 мај 2025 г. Во април 2025 г. гостувавме во Гевгелија со претставата „Петок 13-ти“ во рамки на манифестацијата Гевгелија – град на културата.
Од одобрените и поддржаните проекти од Годишната програма за драмска дејност на Министерството за култура и туризам за 2025 година, во јуни 2025 г. се одржа премиерата на претставата „Синот“ од Флоријан Зелер, во режија на Благој Мицевски. Претставата се одигра во чест на јубилејот 30 години актерска дејност на актерот Кољо Черкезов, кој во претставата ја толкува улогата на Таткото. Претставите „Деца на светот“ и „Синот“ се праизведби на истоимените драмски текстови на македонската театарска сцена. Во рамки на манифестацијата „Штипско културно лето“ 2025 г., во јуни ја изведовме претставата „Пепелашка“.
Почитувана публико, ви благодариме што изминатата сезона бевте со нас и што заедно доживеавме и споделивме различни емоции. Вкупниот број на посетители кои ги проследија нашите претстави во периодот јануари-јуни изнесува 7344. Се гледаме повторно во новата сезона, кога нѐ очекува отворањето на 33. ФКТ „Ристо Шишков“ со претставата „Синот“. Следува гостувањето со претставата „Деца на светот“ во Балчик, Бугарија, а „Пепелашка“ ќе настапи на фестивалот „Малиот принц“ во Штип. Во септември започнуваме со подготовките на новата претстава „Мизантроп“ од Молиер, во режија на Дамјан Тенев.
Билетите за сите наши претстави можете да ги купите на билетарницата како и да ги набавите онлајн на следниот линк www.antonpanov.mk
